Në një artikull në gazetën britanike The Telegraph, pretendohet se grupet kriminale shqiptare dominojnë krimin e organizuar në Britaninë e Madhe.
Në shkrim përmendet rasti i një personi të quajtur Bujar Cozminca, i dënuar me 12 vite burg për furnizimin me kokainë dhe pastrim parash.
“Ka një sasi të madhe të krimit të organizuar shumë të dëmshëm brenda MB të kryer nga bandat kriminale shqiptare …kontrabandë droge, trafik njerëzor, armë ose prostitucion,” tha Dan O’Mahoney, atëherë Komandanti i Kërcënimeve Klandestine i Kanalit të MB-së.
Në shkrim citohet fakti që Home Office i karakterizon grupet kriminale shqiptare si një “kërcënim akut” ndaj Mbretërisë së Bashkuar dhe mjaft të pranishëm në krimin e organizuar dhe serioz.
Po kështu evidentohet përfshirja e grupeve shqiptare në tregëtinë e seksit dhe kultivimin e kanabisit.
“Grupet kriminale shqiptare janë tashmë kombësia e huaj më dominuese e përfshirë në kultivimin komercial të kanabisit në Britaninë e Madhe, pasi kanë zgjeruar ndikimin e tyre pjesërisht duke bashkëpunuar me bandat britanike me rrënjë në zonat e synuar”.
Gjithashtu evidentohet lidhja e grupeve shqiptare me grupet e trafikut të kokainës në Amerikën Latine.
“Një hetim i Telegrafit në 2022 detajoi se si një port në lumin Guayas në qytetin ekuadorian të Guayaquil u bë një qendër kryesore e shpërndarjes për bandat shqiptare të drogës, të cilat ndonjëherë përdornin kompanitë e para për të kontrabanduar kokainën në Evropë, duke e fshehur atë brenda një eksporti legjitim, si p.sh. si çaj. Kontejnerët që përmbajnë ilaçin do të mbërrinin kryesisht në Antëerp në Belgjikë ose Roterdam në Holandë, përpara se të arrinin në MB”.
Pavarësisht se shkrimi përmend kriminelë nga Ballkani Perëndimor që po sjellin krim dhe dhunë në rrugët e Britanisë, fokusi duket se mbeten grupet kriminale shqiptare.
Megjithatë, ajo çka tërheq më shumë vëmendjen është konkluzioni që në titull të artikullit, ku bandat shqiptare klasifikohen si dominuese në krimin e organizuar në Britaninë e Madhe, pretendim ky që do t’i vendoste grupet shqiptare në krye të hierarkisë së krimit, veçanërisht të narkotikëve.
