Policia e Shtetit ka arritur të arrestojë në afërsi të Milotit, një të ri nga Fusha Kruja që kishte fshehur në trup dy mina me telekomandë, të cilat siç u zbulua më pas do t’ia shiste grupeve kriminale në Lezhë. 24-vjeçari A.S. që dyshohet se se i montonte vetë minat u kap gjatë një operacioni të posaçëm në afërsi të Milotit.
Në vazhdën e operacionit kombëtar “Sundimi i Ligjit” dhe në bazë të informacioneve të siguruara nga inteligjenca policore se një person nga Fushë Kruja që po udhëtonte në drejtim të Lezhës kishte me vete mina me telekomandë për t’ua shitur grupeve kriminale, Policia e Shtetit ka organizuar operacionin policor të koduar “Horizonti”.
Policia e ka lokalizuar në afërsi të Milotit të dyshuarin A. S.. Gjatë kontrollit fizik, atij iu gjetën të fshehura në trup, 2 mina me telekomandë me lëndë plasëse C4 për shpërthim në distancë.
Nga hetimet e deritanishme dyshohet se ai i montonte vetë minat, me qëllim shitjen grupeve kriminale.
Në përfundim të veprimeve të para procedurale u bë arrestimi i tij, A. S., 24 vjeç, banues në Fushë Krujë.
Në bashkëpunim me Prokurorinë, vijon puna për dokumentimin e plotë të rrethanave të rastit, si dhe për identifikimin dhe kapjen e shtetasve të tjerë të përfshirë në këtë veprimtari kriminale.
Dosja e tij i kaloi Prokurorisë pranë Gjykatës së Shkallës së Parë të Juridiksionit të Përgjithshëm Lezhë.
