Ka reaguar gjyshi i 18-vjeçares e cila për 9-vite me radhë është abuzuar nga vëllai i njerkës, 33-vjeçari Erjon Pelivani.
Babai i 50-vjeçarit që vrau kunatin pasi zbuloi se abuzonte seksualisht me vajzën nga martesa e parë, ka folur për ngjarjen e rëndë e cila tronditi vendin.
Sipas dëshmisë së 18-vjeçares, 33-vjeçari Erjon Pelivani, vëllai i njerkës së saj, e ka përdhunuar që në moshën 9-vjeçare, ndërsa së fundmi kishte arritur deri në pikën që ta shantazhonte se nëse nuk i jepte para, ai do të publikonte video dhe foto të përdhunimeve.
Prindërit e 50 vjeçarit jetojnë në Shqipëri dhe janë të shokuar.
Në një intervistë televizive, babai i 50 vjeçarit shprehet i shqetësuar pasi ka frikë se mos hakmerren dhe i bëjnë keq djalit të tij. Ai tregon si i biri kishte mësuar për abuzimin seksual dhe kërcënimet që vëllai i nuses bënte ndaj vajzës së mitur.
Si e morët vesh lajmin?
E dëgjuam nga të tjerët dhe nuk e besova, mendova se ka bërë aksident. Kur pyetem mirë e morëm vesh që e ka bërë djali atë (vrasjen).
E keni parë ndonjëherë kunatin?
Po e kemi takuar, e njihnim, por nuk e njihnin për të keq, e dinim njeri të mirë, por paska qenë maskara, të merresh me një fëmijë! I mori paratë çupës (mbesës), që djali ia jepte për qiranë e shtëpisë, se vajza bënte shkollën në Janinë. Djali i çonte para, ai (autori) i kërkonte para çupës, e kërcënonte! Djali im vajti atje dhe i tha çupës ku i ke parë? Çupa filloi të qante dhe i tregoi se paratë ia kanë marrë ai dhe i tregoi gjithë gjërat që kishin ndodhur… (përdhunimi). Djali ka 10 vite i martuar me gruan e dytë. Në Shqipëri vinte rrallë se kishte 5 fëmijë për të rritur. Tre vajza nga martesa e parë, djalin nga martesa e dytë dhe një vajzë që e solli me vete gruaja e dytë.
Keni frikë nga hakmarrja?
Po kemi frikë se mund të ndodhë edhe më keq!
Ngjarja e rëndë u bë publike në mediat greke. Siç raportonte ‘Protothema’, autori e kishte vrarë me arme gjahu, të cilën e kishte me leje, vëllain e gruas së tij të dytë dhe më pas ishte dorëzuar vullnetarisht në polici, duke rrëfyer krimin. 50 vjeçari kishte 3 vajza me martesën e parë ndërsa me gruan e dytë kishte një djalë.
Vajza ka dëshmuar se ngacmimet seksuale kishin nisur në moshën 9 vjeçare dhe përdhunimet kanë ndodhur nga mosha 12 deri në 14 vjeç! Kohët e fundit viktima e shantazhonte se do t’i publikonte video dhe foto intime gjatë akteve të tij, duke i kërkuar një shumë parash, pasi ajo kishte filluar punë.
