6500 policë në terren kundër krimit zgjedhor

Policia e Shtetit ka trajnuar 6500 efektivë për të garantuar një proces zgjedhor të qetë dhe të ligjshëm në zgjedhjet e 11 majit. Lajmi u bë i ditur nga drejtori i Rendit Publik, Agron Çeli, në një intervistë për A2 CNN, ku theksoi se trajnimet janë zhvilluar në bashkëpunim me SPAK, KQZ, OSBE dhe Prokurorinë e Përgjithshme.
Sipas Çelit, punonjësit e policisë janë trajnuar për mënyrën e ndërhyrjes në rastet e krimeve zgjedhore, ruajtjen e objekteve dhe menaxhimin e rendit gjatë fushatës dhe procesit të votimit.
“Trajnimet janë organizuar sipas niveleve dhe kanë nisur në muajin shkurt, duke përfunduar në muajin mars për 6500 policë të strukturave të ndryshme që janë trajnuar. Po ashtu janë trajnuar 1500 policë të Strukturave të Hetimeve të Krimeve, që janë bërë trajnime më vete në bashkëpunim me Prokuroritë të Gjykatave të Juridiksionit të Përgjithshëm në të gjitha drejtoritë vendore. Punonjësit e policisë kanë marrë njohuri të përgjithshme për ruajtjen e objekteve si dhe për angazhimin gjatë fushatës zgjedhore për aktivitetet elektorale dhe detyrimet deri në fund të numërimit të votave”, tha Çeli.