Sopranoja shqiptare me famë botërore, Ermonela Jaho ka marrë pjesë në festën e 50 vjetorit të karrierës së tenorit Placido Domingo.
Sopranoja e ka ndarë kënaqësinë e pjesëmarrjes së saj edhe me ndjekësit e saj në Facebook, teksa ka shkruar:
“Jam shumë e lumtur dhe e nderuar të jem në festimin e 50 vjetorit të karrierës së të Madhit Maestro Placido Domingo në Los Angeles dhe të ndaj skenën me kolegët e mi të mrekullueshëm të dirizhuar nga Dirigjenti James Conlon”, ka shkruar ajo.
Hera e parë e Placido Domingos në Los Angeles ishte në nëntor të vitit 1967, ndërsa tenori është shprehur se nuk e kishte menduar në atë kohë se do të festonte me kaq lumturi e sukses jetën dhe suksesin e tij në skenë pas kaq vitesh.
Tenorit i janë bashkuar edhe artistë të tjerë, si Arturo Chacón-Cruz, Ana María Martínez, Nino Machaidze, Nancy Fabiola Herrera, Janai Brugger, Michael Fabiano dhe Mario Chang, ndërsa Domingo njihet për bashkëpunimin me artistët shqiptarë, përfshirë këtu Ermonela Jahon dhe Ramë Lahajn.
Edhe aktorja e “Orange is the New Black”, Uzo Aduba, ishte e pranishme në këtë koncert, e cila performoi “I could have danced all night”.
Aktorja Helen Mirren po ashtu ishte e pranishme në këtë festim të karrierës së Placido Domingos, i cili është edhe drejtor i Operës së Los Angelosit që nga viti 2003.
