Më shumë se 4 milionë fëmijë dhe të rinj janë të pastrehë në Shtetet e Bashkuara të Amerikës. Ky është rezultati i një studimi të publikuar sot, ku hulumtuesit u shprehën se është më gjithëpërfshirësi i realizuar më parë për këtë çështje.
Studimi është bërë nga Universiteti i Çikagos, i cili ka përcaktuar një përkufizim në kuptimin më të gjërë të termit të pastrehë. Ai ka përfshirë personat që jetojnë në rrugë apo në ndonjë strehë si dhe ata që qëndrojnë përkohësisht te shtëpitë e të tjerëve në mungesë të vendbanimit të përhershëm.
“Sondazhi ynë i jep kombit për herë të parë një pamje më të plotë të të rinjve të pastrehë, duke gjetur madje persona që nuk numërohen gjithmonë”, tha studiuesi Matthew Morton.
Ky studim ka përfshirë të paktën 700.000 adoleshentë mes moshës 13 dhe 17 vjeç pa një vendbanim fiks dhe 3.5 milionë të rinj të moshës nga 18 në 25 vjeç.
Sipas hulumtuesve, në rrezik të veçantë janë të rinjtë afrikano-amerikan dhe hispanikët, si dhe ata që identifikohen si lesbike, homoseksual, biseksual dhe transgjinor. “Ne kemi një detyrim kolektiv që të sigurojmë që të gjithë të rinjtë të kenë një shans për të pasur sukses, duke filluar që nga një moshë e re”, tha Bryan Samuels i Universitetit të Çikagos.
“Si vend, ne mund të kërkojmë për mundësitë e humbura në shkolla, komunitete dhe shërbime publike në mënyrë që të parandalojmë të pastrehët e të rinjve”, shtoi Samuels, duke thënë se duhet ndërhyrë menjëherë nga autoritetet përkatëse për të frenuar këtë fenomen.
Sipas studimit, një pjesë e madhe e 18 dhe 25-vjeçarëve të prekur nga ky fenomen, kanë përvoja që në fëmijëri ose adoleshencë. Ndërsa një e treta kishte pësuar vdekjen e një pjesëtari të familjes duke kaluar kështu një traumë dhe duke i bërë ata më të prekshëm ndaj të pastrehëve. /Tirana Today/
