Sot shënohen 32 vjet nga vdekja e liderit komunist, Enver Hoxha. Ai udhëhoqi Shqipërinë për 40 vite, të cilat mbahen mend për eleminimin e opozitës, dënimet e kundërshtarëve të tij politikë me vdekje, ose burgime të gjata, apo dëbimet e familjeve të tyre nga shtëpitë ku jetonin, si dhe internimet e tyre në fshatra të thella, ku kontrolloheshin rreptësisht nga policia dhe Sigurimi i Shtetit.
Enver Hoxha lindi më 16 tetor 1908, në lagjen “Palorto”, në Gjirokastër. Ishte udhëheqësi komunist i Shqipërisë, nga viti 1944 deri në vdekjen e tij në vitin 1985, si Sekretar i Parë i Partisë së Punës së Shqipërisë.
Lideri komunist u diagnostikua me diabet, ndërsa në 1972 pësoi një infarkt, i cili pasoi me një tjetër infarkt më 1973, duke e rënduar shëndetin e tij akoma më shumë.
Fillimi i prillit, plot 32 vjet më parë, shënoi fundin e jetës së tij. Fillimisht ai pësoi një ishemi, më 9 prill 1985, dhe vdiq pas 2 ditësh, më 11 prill.
Pas vdekjes së tij, u organizua një ceremoni madhështore në varrezat e dëshmorëve, ku iu bënë nderimet më të larta. Mijëra qytetarë shqiptarë vajtuan vdekjen e liderit komunist, i cili udhëhoqi për 40 vite me radhë. Shumë qytetarë e krahasuan vdekjen e Hoxhës me vdekjen e një personi të afërt të familjes.
https://www.facebook.com/Femijeria/videos/931594616976094/
