Rreth 2 600 bizneset që në 1 janar të vitit 2025 dalin në treg të lirë të energjisë elektrike deri në fund të muajit dhjetor duhet të lidhin kontratat me furnizuesit, përndryshe në fillim të vitit të ri rrezikojnë të mbeten pa drita. Bëhet fjalë për bizneset e lidhura në rrjetin e tensionit 10 kilovolt. “Kërkohet që këta të zgjedhin një operator furnizimi të tregut të lirë, janë mbi 20 operatorë të licencuar, një nga këta është dhe FTL që është shoqëri publike, pjesë e OSHEE grup”, thotë Albi Gjenerali, administrator i Furnizuesit të Tregut të Lirë.
Një nga kushtet që duhet të plotësojnë bizneset për lidhjen e kontratave është shlyerja e çdo detyrimi të prapambetur. “Një pjesë kanë debi, bëjnë mirë që t’i shlyejnë në afat, sepse asnjë furnizues nuk mundet të lidhë kontrata furnizimi”, shton Gjenerali.
Rreth 90% e bizneseve të dala tashmë në treg të lirë rezultojnë të kenë lidhur kontratë furnizimi me Furnizuesin e Tregut të Lirë. “Aktualisht menaxhon rreth 90% të portofolit të klientëve që kanë dalë në treg të lirë në fazat e mëparshme, 35 kv dhe 20 kv. Janë rreth 1 770 klientë që furnizohen nga furnizuesi i tregut të lirë”, vijon Gjenerali. Në të gjithë vendin ka mbi 2 mijë biznese të dala në treg të lirë. Në vazhdimësi liberalizimi i tregut të energjisë elektrike do të përfshijë edhe biznese të tjera.
