Inspektorati i Mbrojtjes së Territorit në Tiranë ka reaguar pas aksionit të ndërmarrë nga SPAK dhe Policia, ku dy punonjës të këtij institucioni u arrestuan dhe dy të tjerë u shpallën në kërkim.
Në deklaratë, IMT është distancuar nga ngjarja, duke e cilësuar sjelljen e punonjësve si veprime të izoluara dhe personale. Institucioni thekson se nuk mban përgjegjësi për aktet individuale dhe kërkon nga organet ligjzbatuese që të vijojnë hetimet me vendosmëri.
Ndërkohë, IMT ka ndërmarrë masa të menjëhershme disiplinore duke larguar nga detyra punonjësit e përfshirë në këtë çështje.
Reagimi i Inspektoriatit të Mbrojtjes së Territorit, Tiranë:
Marrë shkas nga ngjarja e ndodhur ditën e sotme, ku katër punonjës të Inspektoratit të Mbrojtjes së Territorit kanë shkelur rëndë ligjin, bëjmë me dije opinionin publik se institucioni ynë e dënon me vendosmëri këtë rast.
Sjellje të tilla janë të papranueshme dhe IMT distancohet plotësisht nga këto veprime individuale. Ndaj personave të përfshirë janë marrë menjëherë të gjitha masat e nevojshme administrative, duke i shkarkuar nga detyra.
Theksojmë se ky rast nuk përfaqëson punën dhe misionin e IMT-së. Institucioni ynë mbetet i përkushtuar të vijojë punën me integritet, transparencë dhe profesionalizëm, në shërbim të interesit publik dhe në mbrojtje të territorit.
IMT inkurajon organet ligjzbatuese për bashkëpunim të plotë dhe ndëshkimin e rastit sipas ligjit, si edhe inkurajon çdo qytetar të denoncojë raste të ngjashme, në mënyrë që të mos mbetet asnjë hije dyshimi mbi integritetin e institucionit dhe misionin e tij.
