Chelsea do të presë në orën 18:30 Liverpoolin në përballjen e 180 mes dy klubeve, ku The Reds regjistrojnë 77 fitore, 66 “Blutë e Londrës” teksa 40 takime kanë përfunduar në barazim. Në vitet e fundit sfida mes dy klubeve është bërë më e zjarrtë se më parë, pasi janë përballur shpesh edhe në kupat e Anglisë, e fundit ishte vetëm pak dit më parë ku Chelsea eliminoi Liverpoolin nga Carabao Cup pas një goli spektakolar në minutat e fundit. “Blutë” madje janë shkaktarë që Liverpooli, një ndër klubet më të lavdishëm të këtij vendi, nuk ka ende një titull në Premier League në 28 vitet e fundit.
Kjo përballje në Premier League bëhet më interesante pasi të dy skuadrat janë duke kaluar një formë mjaft të mirë dhe asnjëra nuk ka pësuar humbje, me Chelsea që është ndalur në një barazim dhe Liverpool që regjistron të gjitha fitore dhe mban vendin e parë.
Të besuarit e Jurgen Kloop kanë një bilanc fantastik me plot 6 fitore radhazi në kampionat, 14 gola të shënuar dhe vetëm 2 të pësuar. E njëjta situatë vjen edhe për Chelsea-in, me një ndryshim të vetëm që skuadra e Sarrit u ndal në barazim në derbin e Londrës kundër West Ham. Gjithsesi edhe blutë deri më tani ende nuk e kanë provuar shijen e humbjes, 5 fitore një barazim 14 gola të shënuar dhe 4 të pësuar.
Interesant është fakti që në 7 përballjet e fundit ndërmjet tyre, nuk është respektuar fare faktori fushë, por gjithsesi në ‘Stamford Bridge’, do të përballen dy filozofi të ndryshme, pasi Liverpooli me lojtarë të tillë si Salah, Mane apo Firmino, përbën një makineri të vërtetë golash, ndërsa trajneri italian kërkon që të arrijë rezultatet e dëshiruara nëpërmjet një loje tepër aktive ku të gjithë janë të përfshirë. Sidoqoftë në Stamford Bridge, Chelsea-Liverpool ashtu si çdo herë tjetër do të jetë një duel zjarri dhe spektakli është i garantuar.
