Policia greke është alarmuar pas një çmendurie të një shoferi, fundi i të cilit ka qenë fatal. Në rrugën nacionale Athinë-Lamia në Greqi, policia ka ndjekur për rreth 2 orë një person që ecte në drejtim të kundërt me një shpejtësi prej 180km/h.
Shoferët e tjerë janë panikuar kur kanë parë mjetin tip Opel Corsa që vinte në drejtimin e tyre, duke u munduar që ta shmangin atë. Por, shoferi i opelit ka bërë rezistencë ndaj automjeteve të policisë, duke i goditur ato me makinën e tij, ose duke i gjuajtur me sende të ndryshme nga dritarja.
E vetmja mënyrë që policia ka mundur ta ndalë shoferin e ‘çmendur’, ka qenë duke vendosur në pikën ku paguhen taksat e rrugës në Tragana, disa furgona, maune dhe makina të policisë, me të cilat shoferi që ecte me shpejtësi 180 km/orë, u përplas duke mbetur i vdekur.
Nga përplasja u plagos dhe një prej shoferëve të kamionëve të vendosur nga policia, ndërsa nuk dihet ende arsyeja e ecjes në kah të kundërt të shoferit që mbeti viktimë e çmendurisë së tij.
