Ministri i Mbrojtjes, Pirro Vengu, ka bërë të ditur se situata e zjarreve në vend mbetet kritike, me 17 vatra aktive në disa qarqe të Shqipërisë. Në një postim në rrjetet sociale, ai deklaroi se në operacionin për izolimin dhe shuarjen e vatrave janë angazhuar rreth 1000 forca, përfshirë trupa ushtarake dhe civile.
Operacionet po koordinohen nga Shefi i Shtabit të Forcave të Armatosura, prefektët përkatës dhe Agjencia Kombëtare e Mbrojtjes Civile. Vengu theksoi se në terren janë përfshirë edhe mjetet ajrore të Forcës Ajrore, me pesë helikopterë që po veprojnë aktualisht në zona me risk të lartë, si Delvinë, Konispol, Berat, Dimal dhe Bërzhitë.
https://www.facebook.com/share/1YNkKUwdDG/?mibextid=wwXIfr
Deri më tani, janë neutralizuar nëntë vatra zjarri, të cilat po monitorohen në mënyrë të vazhdueshme për të shmangur riaktivizimin e mundshëm për shkak të erës dhe temperaturave të larta.
Për të forcuar ndërhyrjen nga ajri, gjatë pasdites pritet të mbërrijnë në Shqipëri edhe dy avionë “Canadair” nga Italia dhe Kroacia. Këto mjete ajrore janë pjesë e mbështetjes ndërkombëtare për menaxhimin e emergjencave natyrore që po përballon vendi.
