Rusia tha se do të jepte një “përgjigje të dhimbshme” ndaj çdo veprimi të Bashkimit Europian që do të përfshinte sekuestrimin e aseteve të ngrira ruse.
Paralajmërimi erdhi ndërsa udhëheqësit e BE-së takohen në Bruksel për të diskutuar një plan për të përdorur asetet si bazë për një “kredi kompensimi” prej 140 miliardë eurosh për Ukrainën.
“Çdo veprim me asetet ruse pa pëlqimin e Rusisë është i pavlefshëm nga pikëpamja e ligjit ndërkombëtar dhe të traktateve. Nuk ka asnjë mënyrë ligjore për të marrë fondet e dikujt tjetër pa dëmtuar xhepin dhe prestigjin e atyre që po shpronësojnë”, u tha gazetarëve zëdhënësja e Ministrisë së Jashtme ruse, Maria Zakharova.
Sipas planit të BE-së, asetet ruse nuk do të sekuestroheshin dhe Rusia do t’i mbante paratë në institucionin financiar belg Euroclear.
Por Zakharova tha se plani tregonte se Europa “nuk është më një strehë e sigurt për asetet financiare”.
“Duke ia besuar fondet tuaja europianëve perëndimorë, përfshirë Euroclear, tani rrezikoni të humbni gjithçka. Ju nxisim të mendoni dy herë para se të ndërmerrni ndonjë veprim të rrezikshëm”, tha Zakhatova.
Vendet e BE-së miratuan zyrtarisht të enjten paketën e 19-të të sanksioneve kundër Rusisë për luftën e saj kundër Ukrainës, që përfshin edhe ndalimin e importeve të gazit natyror të lëngshëm rus.
Presidentja e Komisionit Evropian Von der Leyen reagoi mëngjesin e kësaj të enjteje për paketën e 19 të sanksioneve ndaj Rusisë.
“Shtetet anëtare të BE-së kanë miratuar paketën tonë të 19-të të sanksioneve kundër Rusisë. Ne po e mbajmë presionin e lartë mbi agresorin. Për herë të parë po merremi me sektorin rus të gazit, që është zemra e ekonomisë së tij të luftës,” shkroi në platformën X presidentja e Komisionit Evropian, Ursula von der Leyen. “Nuk do të tërhiqemi derisa populli ukrainas të ketë një paqe të drejtë dhe të qëndrueshme,” shtoi ajo.
Ministria e Jashtme ruse ka reaguar këtë të enjten ndaj sanksioneve të SHBA-së dhe BE-së, duke thënë se këto sanksione funksionuan kundër vetë bllokut dhe se elitat e BE-së nuk mund ta pranoj që sanksionet e tyre nuk do të funksionojnë.
Ministria e Jashtme e Rusisë tha se sanksionet energjetike të SHBA-së ishin jashtëzakonisht “kundërproduktive” për gjetjen e paqes në Ukrainë.
Synimet ruse në Ukrainë mbeten të pandryshuara dhe shkaqet rrënjësore të konfliktit duhet të zgjidhen, u tha gazetarëve në Moskë zëdhënësja e Ministrisë së Jashtme ruse, Maria Zakharova .
SHBA-të kanë vendosur sanksione ndaj Rosneft dhe Lukoil, dy kompanive më të mëdha të naftës në Rusi, ndërsa administrata Trump rriti presionin mbi Kremlinin për të negociuar përfundimin e luftës së saj kundër Ukrainës
