Në rendin e ditës gjatë seancës parlamentare, sot 4 dhjetor, janë edhe tre projektligje për marrëveshje kredie dhe granti për të garantuar financimin për një nga projektet më të rëndësishme hekurudhore në vend, rehabilitimi dhe modernizimi i linjës Durrës-Rrogozhinë.
Ministri i Financave, Petrit Malaj, tha nga foltorja se ky projekt shënon fazën e parë të funksionimit të Korridorit Hekurudhor VIII.
“Projekti nuk është thjesht një ndërhyrje teknike mbi një trase hekurudhore, por një investim strategjik në garantimin e një ndërlidhjeje kombëtare dhe ndërkombëtare”, tha Malaj.
Ai bëri me dije se kostoja totale e projektit parashikohet në vlerën e rreth 120.5 milionë eurove, të cilat do të financohen nga institucionet financiare ndërkombëtare dhe Bashkimi Europian.
“Konkretisht: Një kredi në vlerën prej 30 milionë euro nga Banka Evropiane për Rindërtim dhe Zhvillim (BERZH); një kredi tjetër prej 30 milionë euro nga Banka Evropiane për Investime (BEI) përmes kontratës financiare për projektin “Infrastruktura Hekurudhore e Korridorit VIII, Faza I – Shqipëri”; një grant në shumën prej 60.5 milionë euro i akorduar nga Bashkimi Evropian përmes Fondit të Investimeve për Ballkanin Perëndimor (WBIF)”, tha Malaj.
Ministri theksoi se projekti në fjalë përfaqëson “angazhimin e shtetit shqiptar, jo vetëm për të përshpejtuar modernizimin e rrjetit të transportit, por edhe për të rritur ndërlidhjen ekonomike me rajonin, si dhe për të kontribuar në qëndrueshmërinë mjedisore dhe sociale”.
Përmes këtij rehabilitimi të linjës do të mundësohet, forcimi i lidhjes ndërmjet Portit të Durrësit dhe qendrave industriale e logjistike të vendit; ndërlidhja me linjën Durrës-Tiranë, aktualisht në ndërtim, dhe më tej me Aeroportin Ndërkombëtar të Tiranës, duke mundësuar qarkullim të integruar të mallrave dhe udhëtarëve; lidhja me segmentin Vorë-Hani i Hotit, pjesë e projektit Flagship 3 të Planit të Investimeve të Komisionit Evropian për Ballkanin Perëndimor; mbështetja e zhvillimit ekonomik të zonave urbane të Rrogozhinës, Kavajës, Golemit dhe Lekajt, duke fuqizuar integrimin e tyre në rrjetin kombëtar dhe rajonal të transportit; nxitja e kalimit nga transporti rrugor në transportin hekurudhor, duke promovuar uljen e emetimeve të karbonit, si dhe duke përmbushur objektivat e Axhendës së Gjelbër të BE-së.
