Ditën e sotme ka nisur vulosja dhe paketimi i fletëve të votimit për zgjedhjet e 11 majit për diasporën shqiptare, e cila këtë herë voton për herë të parë.
Në një komunikim për mediat, nga Parku Olimpik, ku ndodhen edhe fletët e votimit, Celibashi deklaroi se procesi i nisur sot pritet që të përfundojë deri nesër në mesnatë.
Ai tha se brenda kësaj jave nëse gjithçka shkon sipas parashikimeve do të nisë edhe shpërndarja drejt vendeve ku jetojnë emigrantët.
“Kemi filluar sot në mëngjes me futjen e fletëve të votimit në zarfin A. Kemi autorizuar 12 përfaqësues të KQZ, që do të vulosin çdo fletë votimit. Janë edhe dy anëtar të tjerë që bëjnë vendosjen e fletës së votimit brenda zarfit. Janë edhe përfaqësues të disa subjekteve që kanë detyra proceduriale, por janë edhe për ta monitoruar procesin.
Ne mendojmë që ta mbyllim brenda kësaj jave. Deri nesër në mesnatë do përfundojë procesi i vulosjes dhe shpresojmë të fillojmë me futjen e zarfit A në zarfin B dhe më pas tek zarfi i operatorit të postës.
Nëse ne përfundojmë këtë proces brenda kësaj jave, brenda fundit të kësaj jave, do të nisin procesin e shpërndarjes për atë sasi që ne do kemi bërë gati. Pra nuk do presim që ta bëjmë gati sasinë e dokumentacionit zgjedhor, por pjesë pjesë.
Nëse ne fillojmë shpërndarjen po themi të hënë që vjen, brenda një ditë për Greqinë apo Italinë do ta kenë zarfin në banesën e tyre”, tha Celibashi.
Po ashtu, Celibashi sqaroi edhe procedurën që do të ndiqet në rast se postieri nuk e gjen në shtëpi votuesin:
“Do të shkojë herën e parë dhe nëse nuk e gjen në banesë do ti lërë një shënim, që erdha dhe nuk ju gjeta dhe do ti lërë një orar. Nëse herën e dytë nuk e gjen sërish do ti lërë një shënim për herën e tretë, nëse herën e tretë sërish nuk e gjen do ti lërë një shënim që dokumentacioni ndodhet në këtë zyrë postare dhe mund të paraqiten për ta tërhequr”, tha ai.
Por si do të kthehet zarfi në Shqipëri?
“Votuesi nga jashtë nuk ka nevojë të shkojë në një zyrë postare. Në momentin që ka përfunduar procesin e votimit, do ta fusë në zarfin A, zarfin A do ta fusë tek zarfi B, më pas zarfin B do ta fusë në zarfin e postës. Më pas do të telefonojë operatorin e shërbimit postar”, u shpreh kreu i KQZ.
