Mbi 50 mijë banorë janë evakuuar nga shtëpitë e tyre në provincat Izmir, Manisa dhe Hatay, për shkak të zjarreve masive që kanë përfshirë këto zona gjatë ditëve të fundit.
Lajmi u konfirmua këtë të hënë nga Agjencia Turke për Menaxhimin e Fatkeqësive (AFAD), përmes një deklarate zyrtare në rrjetin social X.
Sipas autoriteteve, evakuimi është kryer në 41 zona të ndryshme, ku situata është konsideruar e rrezikshme për jetën dhe pronën. Qytetarët janë strehuar në ambiente të sigurta, ndërsa operacionet për përballimin e emergjencës vijojnë në terren.
Në provincën e Izmirit, flakët kanë përfshirë një sipërfaqe të madhe pyjore dhe zona të banuara, duke shkaktuar dëme të konsiderueshme. Ministria e Bujqësisë dhe Pyjeve bëri me dije se erërat e forta po e vështirësojnë ndërhyrjen e zjarrfikësve dhe po favorizojnë përhapjen e zjarreve në territore të reja.
Në operacionin e shuarjes së flakëve janë përfshirë njësi të zjarrfikësve, forcat e ushtrisë, si dhe dhjetëra vullnetarë, të cilët po punojnë pa ndërprerje për të mbrojtur jetën e qytetarëve dhe mjedisin natyror.
Ndërkohë, autoritetet u kanë bërë thirrje banorëve që të ndjekin udhëzimet për evakuim dhe të qëndrojnë larg zonave të rrezikut. Hetimet për shkaqet e zjarreve janë në vijim, ndërsa Turqia vijon të përballet gjithnjë e më shpesh me zjarre të përmasave të mëdha, të nxitura nga temperaturat ekstreme dhe thatësira e zgjatur.
