63 persona kanë humbur jetën në Afrikën e Jugut pasi një zjarr i madh ka rënë në një bllok banesash në Johanesburg.
Zyrtarët e Johanesburgut thonë se është e paqartë se çfarë shkaktoi zjarrin në ndërtesën pesëkatëshe në qendër të qytetit.
63 persona raportohet se kanë humbur jetën, ndërsa 40 të tjerë kanë mbetur të plagosur. Numri i viktimave fatkeqësisht mund të rritet pasi zjarrfikësit nuk kanë nxjerrë ende të gjitha trupat e pajetë nga ndërtesa që u përfshi nga flakët.
Fotot nga vendi i ngjarjes treguan trupa të mbuluar të rreshtuar pranë ndërtesës së djegur. Mediat e huaja raportojnë se banorët e ndërtesës ishin kryesisht emigrantë nga vende të tjera afrikane.
