Qytetarët turq kanë mundësi që të votojnë deri në orën 17:00, për të vendosur nëse do t’i japin Presidentit Recep Tayyip Erdogan një mandat të dytë pesë-vjeçar, në garën më të ashpër që vendi ka parë gjatë viteve.
Nëse ky i fundit fiton, për rrjedhojë do të fitojë pushtet edhe më të madh, për të cilin kritikët thonë se do të dobësojë sundimin demokratik.
Por ai përballet me një sfidë të madhe nga kandidati i qendrës së majtë, Muharrem Ince, i Partisë Popullore Republikane (CHP). Turqia mbetet nën një gjendje emergjence, imponuar pas një grushti të dështuar shteti në korrik 2016. Këto zgjedhje fillimisht ishin planifikuar për në nëntor 2019, por u sollën më herët nga Erdogan.
Sipas statistikave zgjedhore të publikuara nga Komisioni i Lartë Zgjedhor (YSK), 56.322.632 votues do të shfrytëzojnë të drejtën e tyre në 180.065 kuti votimi.
Zgjedhjet e sotme karakterizohen me një numër risish, siç janë “kutia mobile e votimit”, për personat e sëmurë dhe me aftësi të kufizuara, mbajtja e zgjedhjeve presidenciale dhe parlamentare në të njëjtën ditë, si dhe aleancat parazgjedhore mes partive për herë të parë në historinë politike të Turqisë.
