Bashkimi Europian e përshëndeti rrjedhjen e qetë të procesit zgjedhor në Kosovë dhe u shpreh i kënaqur që në raundin e parë të zgjedhjeve lokale më 12 tetor pati pjesëmarrje të të gjitha komuniteteve.
“Për ato komuna ku kryetarët janë zgjedhur në raundin e parë, ne bëjmë thirrje për një certifikim të shpejtë dhe zbatim të rezultateve të zgjedhjeve përmes një tranzicioni të rregullt të pushtetit lokal”, i tha Radios Europa e Lirë zëdhënësja e bllokut, Anitta Hipper.
“Për komunat e tjera, ku do të zhvillohet raundi i dytë i zgjedhjeve për kryetar komune, bëjmë thirrje për një proces po aq paqësor, konkurrues dhe gjithëpërfshirës më 9 nëntor”, shtoi ajo.
Misioni i ekspertëve të BE-së ndodhet aktualisht në Kosovë me ftesë të presidentes Vjosa Osmani. Pjesëtarët e tij po vëzhgojnë ecurinë e të gjithë procesit dhe në fund do të japin vlerësimin e tyre.
“Raporti i Misionit të BE-së për Vëzhgimin e Zgjedhjeve, EOM, në Kosovë, i majit 2025, theksoi disa raste të ndërhyrjeve gjatë zgjedhjeve të përgjithshme të mbajtura në shkurt të vitit 2025. Ne presim që të gjitha palët të frenohen nga veprime të tilla gjatë periudhës zgjedhore”, ishte mesazhi i Hipper.
Zëdhënësja nuk i dha një përgjigje konkrete pyetjes nëse në Bruksel kanë dijeni për ndërhyrje të Serbisë në procesin zgjedhor në Kosovë, por misioni vëzhgues i bllokut për zgjedhjet parlamentare të shkurtit pati konstatuar se mediat shtetërore ruse RT Balkan dhe Sputnik Srbija, të mbështetura nga Kremlini, kishin publikuar dhjetëra materiale për zgjedhjet në Kosovë gjatë fushatës zgjedhore, me “përmbajtje manipuluese” të drejtuara ndaj komunitetit serb.
