Gjatë 90 ditëve të fushatës zgjedhore, kandidatët për deputetë dhe partitë politike në Shqipëri kanë shpenzuar 167,069 dollarë në Facebook, për të sponsorizuar postime dhe për të rritur praninë e tyre në rrjetet sociale. Sipas të dhënave të publikuara nga gazetari Isa Myzyraj, në dhjetëshen e kandidatëve që kanë shpenzuar më shumë, dominojnë përfaqësuesit e opozitës. Vetëm një emër nga mazhoranca, socialisti Vullnet Sinaj, është pjesë e kësaj liste.
Në krye të shpenzimeve është Partia Demokratike, e cila ka investuar 43,873 dollarë për reklamat në Facebook, ndjekur nga Agron Shehaj, lideri i Partisë Mundësia, me 39,014 dollarë të shpenzuara. Shehaj, që garoi i ndarë nga Berisha, arriti të sigurojë dy mandate në Tiranë.
Në vend të tretë renditet PDIU e Vangjel Dules, me 15,285 dollarë, ndërkohë që shpenzimet individuale më të larta i ka realizuar Grigels Muçollari, kandidat i PD-ASHM, me 13,811 dollarë për 90 ditë, duke siguruar 5325 vota, por pa arritur të marrë mandat.
