Presidenti ukrainas Volodymyr Zelensky ka bërë thirrje për një samit trepalësh me Donald Trump dhe Vladimir Putin.
“Nëse Putini nuk ndihet rehat me një takim dypalësh, ose nëse të gjithë duan që ai të jetë një takim trepalësh, nuk më shqetëson. Jam gati për çdo format”, tha Zelensky në komentet për gazetarët.
Udhëheqësi ukrainas tha se ishte “gati” për një takim “Trump-Putin-Zelensky”, dhe gjithashtu i kërkoi Uashingtonit të godasë Moskën me një paketë sanksionesh të ashpra në sektorët e saj bankarë dhe të energjisë.
“Ne po presim sanksione nga Shtetet e Bashkuara të Amerikës”, tha Zelensky.
Zelensky tha gjithashtu se Ukraina ende nuk ka marrë një “memorandum” të premtuar nga Rusia mbi kërkesat e saj për një marrëveshje paqeje.
Ukraina ka akuzuar Rusinë për zvarritjen e procesit të paqes pas bisedimeve të para të drejtpërdrejta në më shumë se tre vjet midis negociatorëve nga të dyja palët në fillim të këtij muaji në Stamboll.
Ministri i Jashtëm rus Sergei Lavrov tha këtë të mërkurë se detajet mbi një raund të dytë negociatash do të shpallen së shpejti.
Zelensky po viziton Gjermaninë për bisedime me kancelarin Friedrich Merz, i cili ka premtuar mbështetje të fuqishme për Kievin në luftën e tij kundër Rusisë.
Presidenti amerikan ka shprehur zhgënjim ndaj Putinit dhe Zelenskyt për mosarritjen ende të një marrëveshjeje për t’i dhënë fund luftës. Të martën, ai vazhdoi të sulmonte udhëheqësin rus.
“Ajo që Vladimir Putin nuk e kupton është se nëse nuk do të ishte për mua, shumë gjëra vërtet të këqija do t’i kishin ndodhur tashmë Rusisë, dhe dua të them SHUMË KEQE. Ai po luan me zjarrin!” shkroi Trump në rrjetin e tij social Truth.
