Dënimi i FIFA-s ndaj FSHF-së, duke i mbyllur 20% të stadiumit për ndeshjen kundër Serbisë, kjo për shkak të sjelljes diskriminuese të tifozëve kuqezi, në takimin kundër Andorrës, u prit shumë keq nga opsioni sportiv. “Neës24” disponon të plotë raportin e delegatit të ndeshjes, i paraqitur në dyert e FIFA-s, çka solli më pas edhe dënimin ndaj FSHF-së.
Në këtë raport, i shoqëruar edhe me video, faktohen thirrjet diskriminuese që kanë ardhur nga sektori N103, bllok ku ishin vendosur grupimet “Tifozat Kuq e Zi” dhe “Iliryan Elite”. Në shënimet që ka mbajtur në dosje delegati, tregohet fare mirë sektori, minuta dhe thirrjet e regjistruara me video: “Incidenti ka nisur në anën veriore të stadiumit, përkatësisht në sektorin N103, nga tifozët shqiptarë, në orën 20:48, minuta e tretë e ndeshjes. Tifozët shqiptarë kanë kënduar këngë ksenofobike. Një grup prej afërsisht 50 tifozësh të pozicionuar në anën veriore, blloku N103 këndonin: ‘Vriti, vriti, vriti serbët’. Kënga ka zgjatur rreth 15-20 sekonda. Kënga ‘Vriti, vriti, vriti serbët ka nxitur urrejtjen ndëretnike dhe dhunë ndaj etnisë serbe. Nuk pati asnjë reagim nga lojtarët ose zyrtarët e ndeshjes (përfshirë arbitrat) ose tifozët. Ky incident nuk u përsërit”, shkruhet ndër të tjera në raportin e FIFA-s., i bërë publik edhe nga Panorama Sport, gazeta më e madhe sportive në vend. Më datën 2 prill, FSHF-ja është informuar për diçka të tillë dhe pas disa ditëve ka ardhur dhe vendimi për “mbylljen” e 20 % të stadiumit për ndeshjen e ardhshme në kualifikueset e Botëror, që për fat të keq përkon me ndeshjen kundër Serbisë.
