Austria, Belgjika, Franca, Gjermania, Polonia dhe Zvicra sapo regjistruan shtatorin më të nxehtë në histori.
Në Gjermani dhe Belgjikë, mesatarja e temperaturave ishte 4 gradë Celsius mbi normalen. Ndërsa në Francë 3.5 gradë. Por në ditën e parë të tetorit rekordet e të nxehtit u thyen në disa rajone të vendit.
Në Bordo njerëzit janë mësuar me të ashtuquajturën “vera indiane”, por në të njëjtën kohë kanë nisur të shqetësohen.
“Është shqetësuese sepse nuk është normale dhe çdo vit moti zgjatet e zgjatet. Të paktën kështu më duket mua. Sidomos vapa, duket sikur është gusht, kur jemi në tetor,” – tha një grua.
“Mund ta shijosh motin, por është shumë shqetësuese. Është e frikshme,” – u shpreh një burrë.
Temperaturat kanë vazhduar të ngjiten edhe në fillim të tetorit. Në Qipro, ato pritet të mbeten mbi 30 gradë Celsius këtë javë; ndërsa në disa rajone të Spanjës dhe Portugalisë do të jenë afër 40-gradëshit.
Në Itali, piku i vapës mbi 30 gradë pritet të dominojë në këto ditë të tetorit në disa rajone. E njohur si “otobrata”, ajo vjen për shkak të anticiklonit afrikan “Apollo”.
