Në orët e para të së martës, një raketë ruse goditi një ndërtesë banimi në lagjen Solomianskyi të kryeqytetit ukrainas, duke shkaktuar shkatërrime të mëdha dhe një numër të lartë viktimash. Deri të mërkurën pasdite, 23 persona janë nxjerrë të vdekur nga rrënojat e kësaj ndërtese, ndërsa në të gjithë Ukrainën raportohet për të paktën 30 të vrarë, shumica në Kiev.
Mes të mbijetuarve është edhe Evhen Povarenkov, 43 vjeç, punëtor magazine, i cili pa shtëpinë e tij të shndërrohej në rrënoja. Ai tregoi se ishte në gjumë kur raketa goditi ndërtesën, ndërsa në dhomën tjetër ndodhej nëna e tij e moshuar.
Ndjeva nxehtësi, zjarr dhe tym. Humba vetëdijen. Kur u zgjova, dëgjova nënën duke bërtitur,” – tha ai, me fytyrën e mbuluar nga plagë dhe syrin e majtë të përgjakur.
Të dy arritën të dalin nga banesa me ndihmën e fqinjëve, por nëna e tij përfundoi në kujdes intensiv me dy klavikula të thyera, plagë në të dy sytë dhe dëmtime të rënda të organeve të brendshme, që kërkuan ndërhyrje kirurgjikale.
Kaos total, çdo gjë digjej”
Sulmi ndodhi gjatë një vale të madhe goditjesh ajrore nga Rusia – sipas Forcave Ajrore të Ukrainës, mbi 440 dronë dhe 32 raketa u lëshuan kundër qyteteve ukrainase, në një nga sulmet më të mëdha që nga fillimi i pushtimit në shkallë të plotë. Gjithçka digjej,” – tregoi Alla, 69 vjeçe, mësuese në pension. – “Tanket e karburantit shpërthenin, xhama thyheshin nga ndërtesat, copa betoni dhe pllaka binin nga lart.”
Në spitalin e qytetit, mjeku Serhii Dubrov, drejtor i Spitalit Klinik Qytetar nr. 12, tha se vetëm aty u trajtuan 27 të plagosur. Ata kishin plagë nga xhama, dëmtime të indeve të buta, trauma të trurit dhe dëmtime të brendshme. Një paciente kishte dëmtim të rëndë në kokë, ndërsa një tjetër mbijetoi falë ndërhyrjes së shpejtë për të ndaluar një arterie të prerë në këmbë.
Viktimat – nga mosha 18 deri në 95 vjeç
Mjeku raportoi se pacientët varionin nga mosha 18 deri në 95 vjeç, duke theksuar rrezikun ekstrem që përfaqësojnë këto sulme për të moshuarit, të cilët shpesh nuk arrijnë të zbresin në strehimore në kohë.
Oleksandr Bondarchuk, 64 vjeç, person me aftësi të kufizuara, tha se nuk kishte mundur të largohej nga apartamenti gjatë goditjes. Ai mbeti i shtrirë në shtrat, i tmerruar, ndërsa gjithçka përreth tij shkatërrohej.
“Gjithçka është shkatërruar,” – tha ai. – “Ky është i vetmi vend që kam.”
Ukrainasit në ankth, sulmet vazhdojnë
Qindra banorë janë zhvendosur, ndërsa autoritetet ukrainase vazhdojnë kërkimet për të mbijetuar në rrënojat e ndërtesës së shembur. Fletët e shtratit, rrobat dhe sendet personale janë shpërndarë nëpër pemë dhe trotuare, ndërsa ndërtesa ka mbetur e hapur nga njëra anë – një plagë e hapur në zemrën e qytetit.
