Në kulmin e luftës tregtare Kinë-SHBA, Vietnami ka shtuar kontrollet për të evituar masat ndaj Amerikës. Pas akuzave se kompanitë kineze po përdorin pikërisht Vietnamin për të evituar tarifat shtesë
Vietnami ka ndërmarrë masa të reja për të ndaluar mashtrimet tregtare që lidhen me eksportin e mallrave nga vende të tjera drejt Shteteve të Bashkuara përmes territorit të saj.
Ministria e Tregtisë ka lëshuar një direktivë zyrtare që ndalon kalimin e paligjshëm të mallrave, duke veçuar raste të tilla nga vende si Kina, e cila ndodhet aktualisht në një luftë të ashpër tregtare me SHBA-në.
Kjo nismë vjen pas akuzave se Kina ka përdorur Vietnamin si një urë për të shmangur tarifat amerikane, duke dërguar mallra që marrin certifikatë origjine vietnameze dhe më pas eksportohen në SHBA me tarifa më të ulëta sesa mallrat që etiketohen si kineze.
Këto praktika kanë ngritur shqetësime serioze mbi integritetin e zinxhirit të furnizimit dhe rregullsinë e tregtisë ndërkombëtare, duke nxitur autoritetet vietnameze të rrisin kontrollin dhe inspektimet për të parandaluar manipulimin e origjinës.
Paralelisht, Kina ka ndërmarrë hapa për të afruar më tej bashkëpunimin ekonomik me Vietnamin.
Pas vizitës së fundit të Presidentit Xi Jinping në Hanoi, dy vendet nënshkruan disa marrëveshje për forcimin e marrëdhënieve tregtare dhe bashkëpunimit institucional, përfshirë edhe fushën e certifikatave të origjinës së mallrave.
Ky afrim ka ngjallur shqetësime në SHBA, e cila e sheh Vietnamin si një pikë të mundshme për devijimin e mallrave kineze drejt tregut amerikan.
Në përgjigje të kësaj situate, qeveria vietnameze ka urdhëruar rritjen e monitorimit dhe verifikimit të origjinës së produkteve të eksportuara, duke kërkuar zbatim të rreptë të standardeve për të garantuar legjitimitetin e eksportit drejt SHBA-së.
Këto masa vijnë në një klimë tensioni tregtar të rritur mes SHBA-së dhe Kinës, dhe synojnë mbrojtjen e interesave ekonomike të Vietnamit, ruajtjen e besueshmërisë ndërkombëtare dhe shmangien e tarifave të reja amerikane ndaj produkteve vietnameze.
