Nga Julia Vrapi
Vepra shqiptare dhe të huaja apo dhe shfaqje premiera këtë sezon në skenën teatrore. Kalendari i shfaqjeve teatrore për muajt maj – qershor në teatrin “Bylis” në Fier sjell drama dhe komedi për publikun. Këto dy muaj në skenën e teatrit “Bylis” do të jenë dy premiera, por në skenë do të jenë dhe vepra rivënie në skenë. Në muajin maj në skenë do të jetë komedia “Klani i të divorcuarve” që vjen në datat 19, 20 dhe 21. Pas kësaj komedie në skenë do të jetë një shfaqje teatrore premierë. Sipas programit që ka bërë me dije teatri, në datat 26, 27 dhe 28 maj në skenë pritet të vijë komedia premierë “Pleqëri me kusure”, shkruar nga Odise Plaku dhe regjia Eliona Thomaraj.
Në vijim të programit artistik në skenë në muajin qershor vjen komedia premierë “Një mbrëmje në teatër” me regji nga Xhuliano Brisku, që sipas programit pritet që të jetë në skenë për publikun në datat 5,6 dhe 7 qershor. Ndërsa në vijim të programit teatror do të jetë shfaqja “15 ditë prilli”. Shfaqja vjen në skenë si rivënie në datat 11 dhe 12 qershor në teatrin “Bylis”. Në datat 2 dhe 3 maj në skenën e “Bylis” do të jetë dhe komedia “Djemtë vezullues” me regji nga Roland Minga, produksion i teatrit të Vlorës, shfaqje që po vijon turin teatror në skena të ndryshme. “Klani i të divorcuarve” është një vepër nga Alil Vardar, përkthyer nga Ylljet Aliçka me regji nga Andia Xhunga. Në role janë Gentian Zenelaj, Rudina Denbacaj dhe Andia Xhunga.
Siç nuk i keni parë, kurrë më parë. Brizhida, Meri dhe Stefani janë 3 gra me moshë, karakter dhe prejardhje të ndryshme, por kanë 3 të përbashkëta: 1) jetojnë në 1 shtëpi. 2) janë të divorcuara. 3) kanë vendosur të shohin drejt së ardhmes. Një komedi lirike mbi dashurinë, mbi shpresën dhe mbi forcën e femrës. Një komedi plot situata dhe batuta. Me tre karaktere kaq të ndryshme, ku keqkuptimet mes tyre, do të krijojnë humor dhe argëtim pa limit.
“15 ditë prilli” në skenë
Vepra teatrore “15 ditë prilli” bazuar në romanin me të njëjtin titull të autores Anisa Markarian shënoi më parë premierën në skenën e teatrit “Aleksandër Moisiu” të Durrësit me regji nga Driada Dervishi. Teksti i shfaqjes është një gërshetim i situatave sa dramatike, aq groteske e me nota humori. Ngjarjet tregojnë 15 ditët e festimit të ditëlindjes së ish-udhëheqësit, i cili zhvillohet gjatë një periudhe dyjavore, duke përshkruar ngjarje të ndryshme që ndodhin brenda kësaj periudhe. Në role janë Yllka Mujo, Hervin Çuli, Alesia Xhemalaj, Romir Zalla, Suela Bako, Mimoza Marjanaku, Amos Zaharia, Adelina Muça, Sanie Hoti, Xhuliano Brisku, Aleksandër Seitaj, Jaho Guma. Kjo shfaqje teatrore që vjen rivënie në skenën e teatrit “Bylis” në Fier në muajin qershor ishte edhe premiera e parë për këtë vit në teatrin “Aleksandër Moisiu”, që u ngjit në skenë në ditët e para të muajt mars.
