Përmbaruesi Fatos Alimadhi i është hequr licenca, pas denoncimit të bërë në një emision investigativ, në nëntor 2022, nga shtetësja Rina Qyra (Hajrie).
Ajo u përball me zyrën e Micro Credit Albania, e cila kërkoi sekuestro prone. Përmbaruesi Fatos Alimadhi bëri fakt të kryer sekuestrimin e një prone në fshatin Bicaj të Gramshit, e cila kishte pronare të vetme nënën e debitores Rina Qyra.
Alimadhi pretendoi se mund të bllokonte pjesën takuese të vajzës debitore, edhe pse e ëma është gjallë dhe për më tepër ndarja nuk është bërë ende me gjyq. Sipas tij, bëhet fjalë për një pronë bujqësore dhe mund të bëhet veçimi i pjesëve takuese të debitores.
Për këtë problematikë, emisioni investigativ “STOP” iu drejtua Ministrisë së Drejtësisë.
Nga ana e zyrtarëve të Drejtësisë u konfirmua se pas hetimit të rastit, është bërë kërkesa në komisionin disiplinor për heqje licence të përmbaruesit Alimadhi. Grupi i inspektimit ka hartuar konkluzionet ndaj punës së përmbaruesit Fatos Alimadhi dhe ministri i Drejtësisë ka dalë me vendim për heqjen e licencës për përmbaruesin Alimadhi.
Fatos Alimadhi është vëllai i ish-deputetit Adriatik Alimadhi. Ai është arrestuar rreth një vit më parë, në Prill 2022, pasi akuzohej se kishte shpërdoruar detyrën me firmën e tij të përmbarimit privat.
