Progresi në vaksinimin e fëmijëve ka ngecur sipas nje studimi te ri dhe miliona të vegjël mbeten të pambrojtur ndaj sëmundjeve të rrezikshme. Ekspertët paralajmërojnë për rrezik duke sugjeruar luftimin e dezinformimit dhe shtimin e fondeve nga qeveritë.
Një studim i ri global ka nxjerrë në pah një prirje shqetësuese në mungesën e vaksinimit të fëmijëve kundër sëmundjeve kërcënuese për jetën.
Gjatë dy dekadave të fundit numri i fëmijëve të pavaksinuar po rritet në mënyrë të qëndrueshme, madje edhe në vende të zhvilluara, shkruan artikulli në revistën mjekësore The Lancet.
Pandemia e Covid-19 e ka thelluar ndjeshëm këtë krizë, duke shkaktuar ndërprerje të programeve rutinë të imunizimit dhe duke lënë miliona fëmijë të pambrojtur ndaj sëmundjeve të rënda si fruthi, tuberkulozi dhe poliomeliti.
Studiuesit po bëjnë thirrje për një përpjekje të përbashkët globale për të garantuar akses më të mirë dhe më të barabartë në vaksina për të gjithë fëmijët, pavarësisht vendit apo statusit ekonomik.
Që nga viti 1974, kur nisi Programi i Zgjeruar i Imunizimit i udhëhequr nga OBSH, më shumë se katër miliardë fëmijë janë vaksinuar, duke parandaluar rreth 150 milionë vdekje në mbarë botën duke u bërë një nga sukseset më të mëdha të shëndetit publik në historinë moderne.
Studimi thekson se gjatë gati një gjysmë shekulli, mbulimi me vaksina është dyfishuar. Megjithatë, që nga viti 2010 progresi ka ngadalësuar ndjeshëm. Në shumë vende, sidomos në rajonet me të ardhura të ulëta dhe të mesme, mbulimi ka rënë në nivele kritike.
Kjo ka krijuar dallime të mëdha mes vendeve të pasura dhe atyre më të varfra, duke ekspozuar miliona fëmijë ndaj rrezikut të infektimit me sëmundje të parandalueshme.
Studiuesit paralajmërojnë se, përveç ndikimit të pandemisë, faktorë si ulja e fondeve ndërkombëtare, dezinformimi, dhe hezitimi i prindërve ndaj vaksinave po kontribuojnë në përhapjen e një krize të re të imunizimit global.
Në përfundim, raporti bën thirrje për veprime të menjëhershëm për të forcuar sistemet shëndetësore, për të luftuar keqinformimin dhe për të siguruar që çdo fëmijë, kudo në botë, të ketë të drejtën për t’u mbrojtur nga sëmundjet që mund të parandalohen me vaksina.
