Forma e treguar në gjysmën e parë të sezonit, ka bërë që Myrto Uzuni të kthehet një nga lojtarët shqiptarë më të kërkuar në merkaton e dimrit.
Sulmuesi beratas është kthyer në një makineri golash në La Liga 2, ku kryeson listën e golashënuesve dhe po udhëheq Granadën drejt synimeve të saj për t’u rikthyer në elitën e futbollit spanjoll. Performanca e tij mahnitëse në fushë ka tërhequr vëmendjen e shumë klubeve, si brenda ashtu edhe jashtë Spanjës.
Sipas raportimeve nga mediat iberike, interesimi për Uzunin ka kaluar kufijtë evropianë. Seatle Sounders nw MLS, ka shfaqur interes për shërbimet e tij, duke parë tek ai, një lojtar që mund të sjellë cilësi dhe përvojë në kampionatin amerikan. Por jo vetëm kaq. Një tjetër emër i madh, si Sevilla po vlerëson seriozisht mundësinë e transferimit të bomberit kuqezi.
Sevilla e sheh Uzunin si një lojtar që mund të bëjë diferencën në sulmin e saj. Për një lojtar si beratasi, i cili tashmë ka provuar veten në nivelet më të larta, një transferim te Sevilla do të ishte jo vetëm një sfidë e re, por edhe një mundësi për t’u rikthyer në La Liga, aty ku nivelet janë më të larta dhe presioni më i madh.
