Sulmuesi i Kombëtares shqiptare, Myrto Uzuni, ndodhet në një situatë të tensionuar me klubin e tij aktual, Granadën, teksa kërkon një transferim te FC Austin në Major League Soccer (MLS).
Oferta e klubit amerikan, që vlerësohet në 9 milionë dollarë, është konsideruar mjaft e rëndësishme nga Uzuni, sidomos për përfitimet ekonomike që ajo përfshin, duke përfshirë një rrogë prej 1 milion euro në sezon.
Megjithatë, Granada ka refuzuar këtë ofertë, duke kërkuar të paktën 12 milionë euro për lirimin e lojtarit. Drejtori sportiv i klubit spanjoll, Alfredo García Amado, ka shprehur habinë e tij për vendimin e Uzunit për të bojkotuar stërvitjet dhe për presionin ndaj klubit për të arritur një marrëveshje transferimi. Sipas tij, klubi ka detyrimin të mbrojë interesat e tij dhe nuk do të ulë kërkesat ekonomike.
Uzuni, i cili ka kontratë me Granadën deri në qershor 2027, ka përfituar tashmë dy përmirësime në pagën e tij dhe është një lojtar kyç për ekipin. Klubi thekson se transferimi i tij mund të ndodhë vetëm nëse plotësohet klauzola e ndërprerjes ose arrihet një marrëveshje që përputhet me vlerësimin financiar të Granadës.
Situata mbetet e komplikuar, teksa Granadën e pret një merkato dimërore sfiduese dhe vendimtare për të ardhmen e lojtarit shqiptar.
