Siguria e vajzave dhe grave në vende të tilla si India është një problem që është ngritur shumë herë nga institucionet apo edhe organizata të ndryshme të të drejtave të njeriut, me sulme të dhunshme apo edhe vrasje makabre të grave në këtë vend.
CNN ka sjellë sot në vëmendje vrasjen brutale të një adoleshenteje 16-vjeçare në New Delhi, që ndërroi jetë pasi u godit disa herë me thikë në një nga rrugicat e kryeqytetit indian.
Ajo që është shqetësuese, është fakti që në videon e kapur nga kamerat e sigurisë, duket se në momentin e sulmit pranë viktimës dhe sulmuesit të saj kaluan disa persona por se asnjëri prej tyre nuk pati asnjë reagim për t’i ardhur në ndihmë adoleshentes.
Vetëm një nga të pranishmit është përpjekur të ndërhyjë duke u munduar të largojë autorin nga viktima, por se është tërhequr shumë shpejt nga ky veprim.
Krimi është cilësuar një krim pasioni dhe autori i dyshuar, një mekanik, është arrestuar tashmë.
“Pashë vajzën time të shtrirë në tokë, me fytyrën në tokë. Gjendja e saj ishte e tmerrshme. Kam dëgjuar që askush nuk e ndihmoi time bijë. Edhe sikur vetëm njëri prej kalimtarëve të bërtiste, mbase do ta kishte ndihmuar vajzën time”, tha babai i vajzës, Janak Raj, për CNN.
Ai ka rrëfyer se vajza jepte mësime private në mënyrë që të ndihmonte familjen nga ana ekonomike.
“Sot më duket sikur edhe unë kam vdekur me të. Më mungon kaq shumë. Ishte një fëmijë kaq i mirë dhe nuk ka asgjë se çfarë të bëj për të ndryshuar situatën”, tha ai.
Incidenti është i fundit në një varg të gjatë vrasjesh dhe përdhunimesh që kanë shkaktuar zemërim në lidhje me faktin nëse po bëhet mjaftueshëm për të mbrojtur gratë në Indi dhe për të ndëshkuar sulmuesit
“Një vajzë e mitur është vrarë brutalisht haptazi në Delhi. Kjo është shumë e trishtueshme dhe për të ardhur keq. Kriminelët janë bërë të patrembur dhe nuk ka frikë nga policia”, shkroi kryebashkiaku i Delhi, Arvind Kejriwal në Twitter.
Swati Maliwal, kryetarja e Komisionit për Gratë në Delhi, tha se nuk kishte parë kurrë një incident kaq të frikshëm.
“Delhi është bërë jashtëzakonisht i pasigurt për gratë dhe vajzat,” shtoi ajo.
India ka luftuar prej kohësh për të trajtuar dhunën gjinore. Një sondazh i vitit 2018 i Fondacionit Thompson Reuters me ekspertë për çështjet e grave, e renditi vendin si shtetin më të rrezikshëm në botë për të qenë një grua.
Frekuenca e krimeve kundër grave në Indi gjithashtu duket të jetë në rritje. Sipas të dhënave nga Byroja Kombëtare e Regjistrimeve të Krimit të Indisë, krimet kundër grave ishin 20% më të larta në vitin 2020 krahasuar me vitin 2013 – viti i fundit para ardhjes në pushtet të Partisë Bharatiya Janata (BJP) në pushtet.
Aktivistët thonë se statistikat reale ka të ngjarë të jenë vetëm maja e ajsbergut, duke pasur parasysh se shumë forma të dhunës ndaj grave, si përdhunimi, shpesh raportohen më pak.
Yogita Bhayana, themeluese e Njerëzit kundër përdhunimeve në Indi, tha se problemi është i rrënjosur kryesisht në normat e vjetra shoqërore.
“Fakti që ne mësojmë të jetojmë me këtë lloj situate në vendin tonë, është shumë për të ardhur keq. Baza patriarkale është krejtësisht e kalbur dhe duhet të marrim masa për të rregulluar një situatë të tillë. Vendosja e kamerave dhe shtimi i efektivëve policorë nuk do të jetë e mjaftueshme. Duhet të punojmë për të ndryshuar mendësinë e djemve dhe burrave në këtë vend”, tha Bhayana për CNN. ”
