Federica Mogherini, ish-diplomatja e lartë e BE-së, ka dhënë dorëheqjen nga pozita e rektores të Kolegjit të Europës, pasi u ndalua, si e dyshuar në një hetim për favorizim në një projekt të financuar nga BE-ja për trajnimin e diplomatëve të rinj dhe zyrtarëve europianë.
Në një deklaratë pas një mbledhjeje të Komitetit Ekzekutiv të Kolegjit të Europës të enjten, Mogherini tha se ka vendosur të japë dorëheqjen si rektore. “Në përputhje me rigorozitetin dhe drejtësinë, me të cilat gjithmonë kam kryer detyrat e mia, sot kam vendosur të jap dorëheqjen si rektore”. Ajo shtoi se do të bashkëpunojë plotësisht me autoritetet dhe mbetet e pafajshme deri në përfundimin e hetimeve.
Ky vendim vjen një ditë pasi zyrtari i lartë i BE-së Stefano Sannino njoftoi se do të largohet në fund të dhjetorit, pasi gjithashtu është i dyshuar në të njëjtin hetim. Sannino është drejtori i Përgjithshëm për Lindjen e Mesme, Afrikën e Veriut dhe Gjirin Persik në Komisionin Evropian.
Hetimi, i udhëhequr nga prokuroria e BE-së, përqendrohet tek një kontratë njëvjeçare që Kolegjit të Europës i ishte dhënë në kuadër të një tenderi për të hapur një akademi për trajnimin e diplomatëve të rinj dhe zyrtarëve evropianë, që do të përfaqësojnë BE-në jashtë territorit të saj.
Prokurorët dyshojnë se gjatë viteve 2021–2022, Kolegi dhe shërbimi diplomatik i BE-së mund të kenë bashkëpunuar në mënyrë të papërshtatshme për të drejtuar fondet e BE-së drejt projektit, duke përfshirë edhe dhënien e informacionit paraprak mbi tenderin, i cili formalisht u hap për universitete nga e gjithë Europa.
Mogherini ka shërbyer si rektore e Kolegjit të Europës që nga viti 2020, duke mbikëqyrur kampuset në Brugge, Varshavë dhe Tiranë. Ajo gjithashtu mori rolin e drejtoreshës së akademisë diplomatike në vitin 2022, një pozicion që qeveritë e BE-së e bënë të përhershëm në vitin 2024, duke e financuar me 1.7 milionë euro në vit.
Në një deklaratë pas lirimit nga paraburgimi, Mogherini tha se ka “besim të plotë në sistemin e drejtësisë” dhe se shpreson që saktësia e veprimeve të Kolegjit të Europës të vërtetohet. Presidenti i Kolegjit, Herman Van Rompuy, kur u kontaktua nga Euractiv, refuzoi të komentojë dhe theksoi se nuk ka dhënë intervista për gjashtë vjet.
Hetimi ende vazhdon dhe Mogherini ende konsiderohet e pafajshme, derisa të përfundojnë procedurat ligjore. Ky rast ka tërhequr vëmendjen e institucioneve europiane dhe publikut, duke nxitur diskutime mbi transparencën dhe përdorimin e fondeve të BE-së në trajnimin diplomatik.
