Me anë të një postimi në rrjetet sociale, ish-presidenti i SHBA-ve Donald Trump ka bërë të ditur anullimin e planeve të tij për të dëshmuar në gjyqin ku është akuzuar për mashtrim civil.
Trump përmendi dëshminë e dhënë nga dëshmitarët e tij ekspertë dhe paragjykimet e pretenduara nga gjyqtari që mbikëqyr çështjen si arsye që ai nuk planifikoi të dëshmonte më.
“TASHMË KAM DËSHMUAR PËR TË GJITHA & NUK KAM ÇFARË TË THEM MË, VEÇ SE KJO ËSHTË NJË NDËRHYRJE TOTALISHT ZGJEDHORE”, ka shkruar ai.
Ish-presidenti do të kthehej në sallën e gjyqit të hënën pasi dëshmoi muajin e kaluar.
Donald Trump vazhdon të ndiqet në gjyq në Nju Jork për një padi civile prej 250 milionë dollarësh që mund të ndryshojë përgjithmonë pasurinë personale dhe perandorinë e pasurive të paluajtshme të tij.
Trump, djemtë e tij Erik Trump dhe dhe Donald Trump Jr., dhe drejtues të tjerë të lartë të Organizatës Trump akuzohen nga Prokurorja e Përgjithshme e Nju Jorkut Letitia James për përfshirje në një skemë dhjetëvjeçare në të cilën ata përdorën “akte të shumta mashtrimi dhe keqinterpretimi” për të rritur pasurinë e Trump për të përfituar kushte më të favorshme kredie. Gjyqi vjen pasi gjyqtari i çështjes vendosi në një gjykim përmbledhës të pjesshëm se Trump kishte paraqitur “vlerësime mashtruese” për pasuritë e tij, duke e lënë gjykimin të përcaktojë veprimet shtesë dhe çfarë dënimi, nëse ka, duhet të marrin të pandehurit.
Ish-presidenti ka mohuar të gjitha keqbërjet dhe avokatët e tij kanë argumentuar se vlerësimet e Trump ishin produkt i aftësive të tij të biznesit.
