Presidenti i SHBA-së, Donald Trump njoftoi sot se kryeministri indian, Narendra Modi kishte rënë dakord për të ndaluar blerjen e naftës ruse, ndërsa SHBA-ja kërkon të ushtrojë presion ekonomik mbi Kremlinin për t’i dhënë fund luftës në Ukrainë, sipas BBC.
Trump u tha gazetarëve se Modi e kishte siguruar se India do të ndalonte blerjet e saj brenda një periudhe të shkurtër kohore.
Presidenti amerikan është përpjekur të shfrytëzojë blerjet e naftës ruse nga India në luftën e tij tregtare, por Nju Delhi deri më tani ka i rezistuar thirrjeve të SHBA-së për ndalimin e gazit nga Rusia.
Duke reaguar ndaj deklaratës së Trump, një zëdhënës i qeverisë indiane tha se diskutimet ishin “në vazhdim” me administratën amerikane, e cila kishte treguar interes për thellimin e bashkëpunimit energjetik me Indinë.
“Prioriteti ynë i vazhdueshëm është të mbrojmë interesat e konsumatorit indian në një skenar të paqëndrueshëm energjetik. Politikat tona të importit udhëhiqen tërësisht nga ky objektiv”, tha zëdhënësi.
Nafta dhe gazi përbëjnë eksportet më të mëdha të Rusisë, dhe klientët më të mëdhenj të Moskës përfshijnë Kinën, Indinë dhe Turqinë.
“Tani duhet ta bind Kinën të bëjë të njëjtën gjë”, tha Trump në Zyrën Ovale, si pjesë e një nxitjeje më të gjerë të administratës së tij për të ndërprerë financimin e energjisë për Moskën.
Në përgjigje, një zëdhënës i qeverisë kineze tha se ruante një bashkëpunim normal dhe legjitim ekonomik, tregtar dhe energjetik me vendet anembanë botës, përfshirë Rusinë.
Kremlini tha se Rusia mund të ofronte naftë me cilësi të mirë dhe me një çmim më të ulët. Një zyrtar tha se, nëse vendeve u ndalohej blerja e naftës së papërpunuar ruse, atëherë kjo do të çonte në shkelje të parimeve të tregtisë së lirë.
Administrata Trump gjithashtu kërkon që Japonia të ndalojë importimin e naftës dhe gazit nga Rusia, dhe sekretari i Thesarit të SHBA-së, Scott Bessent, tha se ia kishte komunikuar këtë ministrit japonez të Financave, Katsunobu Kato.
“India nuk mund të ndalojë “menjëherë” dërgesat e naftës”, tha Trump, duke shtuar se ndryshimi do të ishte një proces i vogël, dhe se ky proces do të përfundonte së shpejti.
Administrata Trump ka vendosur tarifa prej 50% ndaj mallrave nga India, ndërsa Trump i ka karakterizuar si ndëshkim kundër Nju Delhit për blerjen e naftës dhe armëve ruse.
Tarifat – të cilat hynë në fuqi në gusht dhe janë ndër më të lartat në botë – dhe përfshijnë një taksë prej 25% për transaksionet me Rusinë – që janë një burim kyç fondesh për luftën e saj në Ukrainë.
Modi, muaj të tërë, ka ruajtur qëndrimin e tij, duke argumentuar se India ishte neutrale në luftën Rusi-Ukrainë pavarësisht lidhjeve të vendit të tij me presidentin rus Vladimir Putin.
Gjatë një fjalimi në një forum energjie sot në Moskë, Putini tha se vendi ishte ende një nga prodhuesit më të mëdhenj të naftës në botë pavarësisht se përballej me masa “të padrejta”.
“Rusia ruan pozicionin e saj si një nga prodhuesit kryesorë të naftës, pavarësisht përdorimit të mekanizmave të konkurrencës së padrejtë kundër nesh”, tha ai.
