Presidenti i SHBA-së, Donald Trump ditën e sotme thirri një mbledhje me kabinetin e tij qeverisës duke zhvilluar një konferencë për shtyp me gazetarë për çështjen e luftës Rusi-Ukrainë.
Trump lëshoi kritika të ashpra ndaj Vladimir Putinit, duke thënë se nuk është i kënaqur me të dhe se ‘ai vret shumë njerëz’, përfshirë ushtarë rusë dhe ukrainas.
Ai nuk hezitoi të përdorë gjuhë të fortë, duke deklaruar shprehimisht: “Putin na hedh shumë budallallëqe.” Njëkohësisht, komentoi me ironi se presidenti rus “është gjithmonë i sjellshëm, por në fund kjo nuk ka rëndësi fare.”
I pyetur nëse planifikon të ndërmarrë veprime kundër Putinit, Trump u përgjigj në mënyrë enigmatike: “Nuk do t’jua thosha,” duke lënë të hapur çdo mundësi. Megjithatë, ai pranoi se lufta “rezultoi më e ashpër” nga sa kishin parashikuar fillimisht amerikanët.
Kur u pyet nëse dëshiron të vendosen sanksione të mëtejshme ndaj Rusisë, u përgjigj: “Po e shqyrtoj.”
Vlen të theksohet se gjatë fushatës së tij zgjedhore, ai ka deklaruar në mënyrë të përsëritur se mund të përfundojë luftën në Ukrainë brenda një dite, diçka që deri më sot nuk është provuar në praktikë.
