Ka kaluar më shumë se 10 ditë nga Samiti i Alaskës ku presidenti i SHBA-së Donald Trump dhe ai i Rusisë Vladimir Putin, konfirmuan njëzëri se patën një takim jashtëzakonisht produktiv dhe ranë dakord për shumë pika, ku më e rëndësishmja sipas tyre kishte një shans shumë të mirë për të arritur qëllimin e paqes në Ukrainë.
“Nuk jemi ende atje, por kemi një shans shumë të mirë për të arritur atje. Nuk ka marrëveshje derisa të ketë një marrëveshje”, tha Trump në konferencën për mediat pas Samitit.
Por 12 ditë më pas, më 28 gusht, kryeqyteti i Ukrainës Kievi, u godit nga sulmet ruse duke lënë pas 19 viktima civilë, mes të cilëve dhe 4 fëmijë.
Lajmi i vdekjes së 19 qytetarëve në Kiev ka shkaktuar reagime të shumta, deri në administratën amerikane, duke bërë që Trump të humbasë durimin.
Shtëpia e Bardhë ka lajmëruar konferencë për shtyp këtë pasdite, ndërsa reagimet e liderve evropianë kanë qenë të ashpër ndaj Moskës.
Kryetarja e Komisionit Ekzekutiv të Bashkimit Evropian, Ursula von der Leyen, ka folur për zemërimin e saj ndaj sulmit më vdekjeprurës të Rusisë ndaj Kievit që nga korriku – i cili dëmtoi edhe zyrën e delegacionit të BE-së në kryeqytetin ukrainas.
Në një deklaratë me fjalë të ashpra, von der Leyen tha se raketat ruse goditën në afërsi të misionit diplomatik: “Dy raketa goditën në një distancë prej 50 metrash (165 këmbë) nga delegacioni brenda 20 sekondave.”
