Presidenti i SHBA-së Donald Trump, i cili ka lobuar fort në NATO për të rritur objektivat e shpenzimeve të mbrojtjes në 5% të Prodhimit të Brendshëm Bruto (PBB), tha dje se të gjitha 32 vendet anëtare të NATO-s duhet ta përmbushin këtë objektiv – përveç Shteteve të Bashkuara. I pyetur nga një gazetar të premten përpara samitit të NATO-s javën e ardhshme në Hagë, Trump tha se anëtarët e tjerë duhej të paguanin më shumë sepse kanë shpenzuar shumë për një kohë të gjatë në kurriz të shpenzimeve të mbrojtjes së SHBA-së. Mendoj se duhet ta bëjnë këtë. Nuk mendoj se duhet. Por, mendoj se duhet”, u tha Trump gazetarëve në pistën e një aeroporti në New Jersey “Ne e kemi mbështetur NATO-n për kaq kohë. Në shumë raste, besoj, duke paguar pothuajse 100% të kostove, kështu që nuk mendoj se duhet, por mendoj se vendet e NATO-s duhet ta bëjnë, absolutisht”, theksoi ai.
Trump veçoi Spanjën dhe Kanadanë si vende me pagesa veçanërisht të ulëta.
“NATO-ja do të duhet të merret me Spanjën”, tha Trump, duke thënë se vendi ishte “gjithmonë një paguese shumë pakët”, por shtoi se Spanja duhet të paguajë “atë që të gjithë të tjerët duhet të paguajnë”.
Kryeministri spanjoll, Pedro Sánchez informoi sekretarin e përgjithshëm të NATO-s, Mark Rutte, për kundërshtimin e vendit të tij ndaj objektivit të ri prej 5% në një letër të enjten.
Sa i përket fqinjit verior të SHBA-së, Trump tha se Kanadaja “është pothuajse më e ulëta” kur bëhet fjalë për kontributet në NATO.
“Ata kanë thënë ‘pse duhet të paguajmë kur Shtetet e Bashkuara do të na mbrojnë falas?’”, tha Trump duke shtuar se Kanadaja ka pasur kryesisht të drejtë për këtë.
Nën presionin e Trump, aleanca e mbrojtjes pritet të bjerë dakord në samitin e javës së ardhshme për të investuar të paktën 3,5% të PBB-së kombëtare në mbrojtje në të ardhmen.
Një shtesë prej 1,5% do të ndahet për shpenzime që lidhen me mbrojtjen, siç është infrastruktura.
Kjo do ta çonte totalin në një kuotë prej 5%, të cilën Trump e ka kërkuar prej kohësh.
