Donald Trump ka reaguar sërish mbi tarifat e tij, të cilat po vazhdojnë të ndikojnë në tregje.
Ai konfirmoi se ka folur me kryeministrin e Japonisë Shigeru Ishiba dhe se po dërgonte një ekip të lartë për të negociuar.
Trump përmendi gjithashtu Kinën dhe tha se marrëdhëniet duhet të ndryshojnë.
“Vendet nga e gjithë bota janë duke zhvilluar bisedime me ne. Parametra të vështira, por të drejta janë duke u vendosur. Kam folur me kryeministrin japonez mëngjesin e sotëm. Ai po dërgon një delegacion të lartë për të negociuar. Ata e kanë trajtuar SHBA shumë dobët në tregje. Nuk merrnin makinat tona, por ne marrim miliona makina të tyre. Njësoj edhe me agrikulturën dhe gjërat e tjera. Gjithçka duhet të ndryshojë, veçanërisht me Kinën”, shkruan Trump në Truth Social.
Vendet po përpiqen të kuptojnë se si t’i përgjigjen tarifave për momentin, me Kinën dhe të tjerët që hakmerren.
Trump zbuloi një tarifë shtesë prej 34% për të gjitha mallrat kineze të importuara në SHBA të mërkurën e kaluar, duke i çuar tarifat për të gjitha importet kineze në SHBA në mbi 54%.
Kina nga ana e saj lëshoi tarifa hakmarrëse prej 34% për importet e mallrave amerikane.
