Policia e Kosovës ka arrestuar sot Milun Milenkoviç- Llune, njëri nga udhëheqësit e formacionit kriminal “Mbrojtja Civile”.
Milenkoviç ishte edhe organizatori kryesor i sulmeve ndaj forcave të KFOR-it dhe Policisë së Kosovës që ndodhën më 29 maj 2023 në Zveçan.
Arrestimin e tij e ka bërë të ditur ministri i Punëve të Brendshme, Xhelal Sveçla.
Sveçla ka thënë se gjatë arrestimit të tij, janë sulmuar zyrtarët e Policisë së Kosovës, ku tre nga ta janë të lënduar lehtë.
“Siç dhe kam theksuar në vazhdimësi,koha e bandave kriminale në veriun e vendit tonë ka përfunduar. Të gjithë individët apo grupet kriminale që kanë cenuar sigurinë dhe rendin kushtetues të Republikës së Kosovës, do të përballen me drejtësinë”, ka shkruar Sveçla në Facebook.
Milun Milenkoviç gjithashtu raportohet se është trajner i njohur i kikboksit në veri të Mitrovicës dhe i dyshuar për disa krime në të shkuarën.
Sirenat e alarmit janë dëgjuar në veri pasditen e së martës, teksa bëhet e ditur që qytetarët serbë kanë filluar të grumbullohen në qytet.
