Një defekt i dyfishtë në motorët e avionit dyshohet të jetë shkaku kryesor i aksidentit ajror që ndodhi javën e kaluar në Indi, ku një Boeing 787 Dreamliner i kompanisë “Air India” u rrëzua pak minuta pas ngritjes, duke shkaktuar vdekjen e më shumë se 270 personave.
Avioni ishte nisur nga qyteti Ahmedabad me destinacion Londrën, por u përplas me një godinë të një kolegji mjekësor, duke shkaktuar zjarr të fuqishëm që përfshiu ndërtesën dhe avionin. Ngjarja po hetohet nga Byroja e Hetimeve të Aksidenteve Ajrore të Indisë, me ndihmën e ekspertëve nga Shtetet e Bashkuara, Britania dhe përfaqësues të kompanisë Boeing.
Sipas raportimeve fillestare të publikuara nga Wall Street Journal, dyshohet se avioni gjatë ngritjes ka kaluar në funksionimin e një sistemi emergjence të energjisë, të njohur si “ram air turbine”, çka tregon se motorët mund të kenë pësuar një dështim të menjëhershëm. Pilotët kishin vetëm 17 sekonda kohë për të reaguar, teksa avioni ndodhej në një lartësi prej 120 metrash.
Një video e re me cilësi të lartë, e bërë publike këtë javë, mbështet gjithashtu teorinë e dështimit të dyfishtë të motorëve. Sipas pilotit dhe analistit Steve Schreiber, pamjet janë një “pikë kthese” në hetimin e aksidentit.
Zyrtarët indianë konfirmuan se pilotët lëshuan një thirrje emergjente “mayday” pak çaste para rrëzimit.
Hetimet vijojnë dhe po analizohen të dhënat e kutive të zeza, pesha e avionit, përgatitja e pilotëve dhe gjendja teknike e mjetit ajror. Një raport paraprak mbi aksidentin pritet të publikohet brenda tre muajsh.
