Presidenti i SHBA-ve Donald Trump dhe ai i Rusisë, Vladimir Putin janë duke zhvilluar një telefonatë, e cila sipas raportimeve ka nisur rreth 1 orë e gjysmë më parë.
Dy liderët kanë konfirmuar më herët se do të zhvillonin komunikimin e radhës mes tyre gjatë ditës së sotme, por axhenda e telefonatës apo pikat e diskutimit gjatë saj nuk janë bërë publike.
Më herët zëdhënësi i Kremlinti, Dmitry Peskov lajmëroi se detajet e komunikimit do të bëheshin publike me përfundimin e komunikimit mes Trump dhe Putin.
Në telefonatën e tyre të fundit kreu i Shtëpisë së Bardhë dhe shefi i Kremlinit kanë diskutuar për një sërë temash, si situata në Lindjen e Mesme, por edhe gjetja e një marrëveshjeje për fundin e luftës në Ukrainë.
Vetë Trump deklaroi pak ditë më parë se në komunikimin e fundit me Putin, ky i fundit i ofroi ndihmë për zgjidhjen e konfliktit me Iranin, por presidenti amerikan i bëri të qartë se lideri rus do ta ndihmonte më shumë nëse do të zgjidhte konfliktin në Ukrainë.
