Presidentja e Maqedonisë së Veriut, Gordana Siljanovska Davkova, ka reaguar ashpër ndaj thirrjeve të urrejtjes drejtuar shqiptarëve gjatë një ndeshjeje basketbolli mes Maqedonisë së Veriut dhe Rumanisë, që u zhvillua fundjavën e kaluar në Kumanovë. Ajo e ka cilësuar incidentin si një akt të turpshëm, duke theksuar se sjellje të tilla nuk përfaqësojnë vlerat e shoqërisë maqedonase.
“Për shkak të mungesës së kulturës sportive, që fatkeqësisht përsëritet vazhdimisht, reagimet e shumta ndaj ngjarjes së rëndë në Kumanovë janë plotësisht të justifikuara. Disa tifozë të papërgjegjshëm shprehën urrejtje të thellë ndaj bashkëqytetarëve tanë shqiptarë – dhe me këtë akt nuk i goditën vetëm ata, por na turpëruan të gjithëve, përfshirë vetveten”, ka shkruar presidentja në një postim në Facebook.
Ajo theksoi se Maqedonia e Veriut nuk do të lejojë më që arenat sportive të shndërrohen në vende për shpërthime urrejtjeje, duke paralajmëruar masa më të ashpra ndaj sjelljeve të tilla. Sipas saj, edukimi për sjelljen në sport duhet të fillojë që në familje dhe të vijojë në sistemin arsimor.
Presidentja shtoi se është e domosdoshme që shteti të veprojë ndaj urrejtjes së shprehur në emër të sportit dhe të krijojë një kulturë të brohoritjes që nxit gëzim dhe bashkim, jo përçarje dhe dhunë. “Na nevojitet një alfabet i ri – ai i brohoritjes së shëndetshme dhe sportdashëse”, tha ajo.
Incidenti në Kumanovë përfshiu thirrje të rënda me përmbajtje raciste e fashiste si: “Maqedoni e pastër”, “Shqiptari i mirë është shqiptari i vdekur” dhe “Dhoma e gazit për shqiptarët” – parulla që ngjallin kujtime të errëta nga retorika e shfarosjes. Ato u dëgjuan edhe në prani të kryeministrit maqedonas dhe zyrtarëve të tjerë të lartë shtetërorë, duke nxitur reagime të ashpra brenda dhe jashtë vendit.
