Një tërmet me magnitudë 6.3 ka tronditur sot provincën bregdetare të Esmeraldas në veriperëndim të Ekuadorit, duke shkaktuar të paktën 20 të plagosur dhe dëme të konsiderueshme në infrastrukturë.
Sipas Shërbimit Kombëtar të Menaxhimit të Rrezikut (SNGR), tërmeti ka dëmtuar të paktën 60 ndërtesa, ndërkohë që janë raportuar probleme në rrjetin e energjisë elektrike dhe telekomunikacionit. Gjithashtu, një urë dhe disa segmente rrugore kanë pësuar dëmtime serioze.
Epiqendra e tërmetit u regjistrua 8.4 kilometra larg qytetit Esmeraldas, kryeqyteti i provincës me të njëjtin emër. Të dridhurat u ndjenë në 10 nga 24 provincat e vendit, sipas një njoftimi zyrtar të postuar në platformën X nga autoritetet e menaxhimit të fatkeqësive.
Shërbimet e emergjencës ndodhen në terren dhe po vlerësojnë dëmet, ndërsa ekipet e shpëtimit vijojnë të ndihmojnë banorët e prekur nga tërmeti. Nuk raportohet ende për viktima në njerëz.
Në një vend të njohur për aktivitetin sizmik, autoritetet i kanë bërë thirrje qytetarëve të mbeten vigjilentë për pasgoditje të mundshme dhe të ndjekin udhëzimet e sigurisë.
