Presidenti i Rusisë, Vladimir Putin dhe homologu i tij amerikan, Donald Trump, zhvilluan një bisedë telefonike që zgjati afro 50 minuta të shtunën, ku diskutuan për situatën e tensionuar në Lindjen e Mesme dhe bisedimet për paqe në Ukrainë, raportoi agjencia AP, duke cituar zyrtarë të Kremlinit.
Sipas këshilltarit për politikën e jashtme të Putin, Yuri Ushakov, biseda u përqendrua kryesisht te përshkallëzimi i rrezikshëm i situatës në Lindjen e Mesme. Putin informoi Trump për kontaktet e tij të fundit me liderët e Iranit dhe Izraelit dhe ritheksoi propozimin e Rusisë për të gjetur një zgjidhje të pranueshme për të gjitha palët në lidhje me çështjen bërthamore iraniane.
Nga ana e tij, presidenti amerikan e cilësoi situatën në Lindjen e Mesme si “shumë shqetësuese”.
Kremlini njoftoi gjithashtu se Putin e informoi Trumpin për progresin në zbatimin e marrëveshjes së shkëmbimit të të burgosurve me Ukrainën. Putin shprehu gatishmërinë e Rusisë për të vazhduar negociatat me Ukrainën pas datës 22 qershor, sipas raportimeve të agjencisë shtetërore ruse RIA.
Ndihmësit e Kremlinit bënë të ditur se Trump përsëriti interesin e tij për një zgjidhje të shpejtë të konfliktit në Ukrainë.
