Qendra e Artit në Elbasan, ka bërë një analizë të punës për 6 muajt e parë të vitit 2017, ndërsa drejtorit Kliti Kapaj, tha se ky ishte një sezon i suksesshëm. Kapaj përmend “La Traviatën” si një arritje, por edhe shfaqje të tjera si “Recital” i kompozitorit Klement Marku,” Koncerti i harqeve” apo dhe shfaqeje për artdashësit e vegjël.
“Një risi në Qendrën e Artit, në Teatrin Skampa të Elbasanit është që çdo zhaneri si i artit skenik, fotografik, individual dhe kolektiv kanë pasur mundësinë dhe kohën e vet në teatrin Skampa. Disa aktivitete të rëndësishme janë bërë gjatë kësaj faze të parë të vitit siç është rikthimi i një opere mbas 40 vitesh në Teatrin Skampa, “La Traviata” në bashkëpunim të ngushtë me Teatrin e Operas dhe Baletit. Kishim një premierë teatrale të suksesshme “Hajduti ka shumë duar” me regji të Haxhi Ramës. Është kthyer gjithashtu mbas shumë vitesh Maratona Rinore që është një aktivitet rinor që i jep një hapësirë rinisë të gjejë veten, talentin dhe të shprehin aftësitë e veta”, tha Kapaj.
Edhe ky sezon pritet të ngjisë në skenë një numër të madh shfaqjesh, por drejtuesi Kliti Kapaj, ngre shqetësimin e mungesës së investimeve, pasi Teatri Skampa, është në gjendje të amortizuar, raporton Ora News. Sezoni i ri do të çelet me shfaqjen e regjisorit Spiro Duni.
