“Burgenstock Hotel Resort”, pranë liqenit të Luzernit në Zvicër, është vendi ku do të mbahet Samiti i Paqes për Ukrainën në mes te qershorit.
Këto janë pamje me dron të resortit të famshëm, luksoz, por edhe larg qytetërimit, atje ku liderët botërorë, thuajse 80 prej tyre tashmë të konfirmuar, do të takohen pas 2 javësh, në një përpjekje të radhës, për të ulur armët e për të gjetur dakordësinë apo mundësinë e një dakordësie mes Vladimir Putinit dhe Volodymir Zelensky-t.
Pozicionuar në majën e malit, me pamje fantastike të liqenit dhe natyrës e gjelbërimit që e rrethon, në samit, e kësisoj të ftuar në hotelin luksoz zvicerian, mes më të famshëmve, do të jetë përfaqësues e liderë të gati 100 shtete të botës dhe padyshim, drejtues të organizatave ndërkombëtare.
Presidenti ukrainas, Zelensky shpreson dhe lutet madje, që takimi të prodhojë në mos armë-pushim, edhe një presion më të madh të botës ndaj Rusisë dhe Putinit. Pritet po ashtu dhe sytë janë nga Turqia, Amerika dhe Kina, që të avancojnë drejt një “Formule paqeje”, për të tërhequr fillimisht trupat ruse nga Ukraina, por Zelensky kërkon edhe rikthimin e kufijve ukrainas të vitit 1991.
Në samitin e Zvicrës, Rusia, por edhe Kina, nuk kanë marrë një ftesë por Rusia ende e pret një të tillë, në mos për Putinin, të paktën për Sergei Lavrov, që gjithsesi flet në emër të shefit të tij.
