Pas përfundimit të aventurës shumëvjeçare me FC Basel, Taulant Xhaka ka surprizuar të gjithë me zgjedhjen e tij të re.
Jo një klub elitar dhe jo një transferim për të përfunduar karrierën në qetësi, por një rikthim te rrënjët, duke u bashkuar me FC Dardania Basel, një ekip shqiptar që garon në ligën e katërt të Zvicrës.
34-vjeçari do të marrë një rol të dyfishtë te Dardania, duke qenë njëkohësisht trajner dhe lojtar, një mision që shkon përtej fushës së lojës.
Lajmi është bërë zyrtar nga vetë klubi në rrjetet sociale, ku njoftimi është shoqëruar me një përshëndetje emocionuese dhe mirënjohje për një nga emrat më të respektuar të futbollit shqiptar.
“Mirë se vjen, Legjendë! Një profesionist shembullor, një luftëtar në fushë dhe një frymëzim për brezat e rinj. Prania jote është një nder për gjithë komunitetin tonë.” – thuhet në deklaratën e klubit.
Krah Xhakës në këtë aventurë të re do të jetë edhe Argjend Turkaj, i cili do të mbajë rolin e ndihmëstrajnerit.
Ky vendim i Taulant Xhakës shihet si një gjest simbolik dhe i madh për komunitetin shqiptar në Zvicër, duke sjellë jo vetëm përvojë në fushë, por edhe identitet, krenari dhe një model për të rinjtë që rriten larg atdheut, por me rrënjë të forta.
FC Dardania tani nuk është thjesht një ekip amator, por një klub që përfaqëson shpresë, përkushtim dhe vlera, dhe me Xhakën në krye, gjithçka merr një tjetër dimension.
