Presidentja e Kosovës, Vjosa Osmani, deklaroi sot se anëtarësimi i Kosovës në NATO është një domosdoshmëri strategjike për paqen dhe stabilitetin në rajon dhe në mbarë kontinentin evropian.
Në një konferencë për media pas takimit me Sekretarin e Përgjithshëm të NATO-s, Mark Rutte, Osmani theksoi se Kosova synon të thellojë partneritetin me Aleancën dhe të zhvillojë Forcën e Sigurisë së Kosovës në një ushtri moderne dhe ndërvepruese me forcat partnere.
Ajo nënvizoi se Kosova është një nga vendet më pro-NATO në botë dhe se qytetarët e saj do të jenë përjetësisht mirënjohës për rolin e aleancës në lirinë e vendit. Osmani gjithashtu tha se Kosova tashmë ka arritur objektivin e NATO-s për 2% të shpenzimeve për mbrojtjen dhe do të nisë së shpejti prodhimin e municioneve dhe dronëve.
Duke folur për tensionet me Serbinë, Osmani akuzoi Beogradin për përpjekje destabilizuese në rajon dhe kërkoi që NATO të mbështesë më tej sigurinë dhe fuqizimin ushtarak të Kosovës.
