Gjatë vizitës së kryeministrit në detyrë të Kosovës, Albin Kurti, këtë të mërkurë në Skënderaj, eskorta e tij u sulmua me vezë.
Kryetari i degës së Lëvizjes Vetëvendosje në këtë komunë, Hysni Mehani, akuzoi Partinë Demokratike të Kosovës (PDK) për organizimin e sulmit.
“Sulmet e Sami Lushtakut me vezë janë dëshmi që ju ka lagë baruti, po ashtu dëshmi e mendësisë primitive që udhëheq me PDK-në në Skënderaj e fatkeqësisht krejt PDK-në”, shkroi Mehani.
Ndërkohë, Policia e Kosovës njoftoi pasdite se ka pezulluar për 72 orë tre zyrtarë policorë në lidhje me incidentin që cënoi rendin dhe qetësinë publike ndaj eskortës së kryeministrit në detyrë.
“Hetimet e mëtejme ndaj zyrtarëve policorë për shkelje të mundshme do të zhvillohen nga institucionet përkatëse kompetente,” theksohet në njoftimin e policisë.
Albin Kurti ndodhej në Skënderaj për të marrë pjesë në përurimin e një çerdheje paraditen e së martës.
