Izraeli i bëri thirrje banorëve të Gazës të largohen nga shumica e vendbanimeve në jug të Rripit të Gazës, pasi planifikohet të nisë një sulm të paprecedentë kundër organizatave terroriste në zonë, sipas një urdhri për evakuim të botuar në arabisht.
Urdhri prek qytetet më të mëdha, Rafah dhe Khan Younis, si dhe të gjitha vendbanimet e tjera në Gazën jugore përveç Al-Mawasi, sipas një harte të botuar nga ushtria.
Banorët e Gazës u njoftuan të zhvendoseshin nga Al-Mawasi në Gazën jugperëndimore, e cila është caktuar si zonë humanitare gjatë luftës.
“Militantët vazhduan të sulmonin me raketa nga zonat e prekura nga urdhri i evakuimit”, tha ushtria izraelite, pasi raportoi bombardime nga jugu i territorit palestinez sot në mëngjes.
Sipas dëshmitarëve okularë, shumë njerëz iu bindën thirrjes për evakuim.
Megjithatë, një numër i madh vdekjesh u raportua nga Khan Younis, qyteti i dytë më i madh në Rripin e Gazës, ndërsa ushtria izraelite përsëriti se qyteti konsiderohej një “zonë e rrezikshme luftimi”.
“Spitali Nasser dhe Spitali Al-Amal në Khan Younis janë përjashtuar nga urdhri i evakuimit”, sipas ushtrisë.
